У межах святкавання 80-годдзя Перамогі савецкага народа ў Вялікай Айчыннай вайне Нацыянальны акадэмічны драматычны тэатр імя Якуба Коласа прапануе гледачам шэраг спектакляў, прысвечаных гэтай знакавай даце. З 6 па 10 мая адбудуцца пастаноўкі, у якіх асветлены ваенныя і пасляваенныя падзеі.
6 і 7 мая – жыццёвая меладрама «Саня, Ваня, з імі Рымас» У.Гуркіна. Тры сястры з уральскай вёскі – Ганна, Соф'я і Аляксандра – спадзяюцца, што навала Вялікай Айчыннай вайны абміне іх... Бяда прыходзіць нечакана, калі на Івана, мужа Аляксандры, і на Пятра, мужа Соф’і, піша данос разбэшчаны старшыня калгаса. Кармільцам толькі адна дарога – на фронт дабравольцамі, каб там бараніць сваіх каханых і родных. Вайна мінае... Аляксандра не дачакалася Івана, і збіраецца звязаць свой лёс з Рымасам Пацісам, які дапамагаў сям’і выжыць у галодныя ваенныя гады. Але Іван усё ж такі вяртаецца...
Дарэчы, 12 мая спектакль «Саня, Ваня, з імі Рымас» адкрые ў Мінску III Рэспубліканскі тэатральны фестываль «Перамога», будзе паказаны на вялікай сцэне Нацыянальнага акадэмічнага драматычнага тэатра імя Янкі Купалы.
Працягне шэраг ваенных спектакляў 8 мая споведзь «Незагойная рана». Гэты монаспектакль у выкананні адной са старэйшых артыстак тэатра Зінаіды Гурбо складаецца з трох навел. «Незагойная рана» паводле апавядання народнага пісьменніка Беларусі Васіля Быкава распавядае пра страшную трагедыю беларускага народа праз прызму ўспрыняцця простай вясковай кабеты Тэклі, якая згубіла свайго сына-салдата. У «Memento mori» актрыса словамі Янкі Брыля ўзнімае тэму «вогненных» вёсак. Іх гора яшчэ раз нагадвае пра жудасную трагедыю Хатыні. «Балада пра смяротнікаў» Уладзіміра Караткевіча – гэта своеасаблівая споведзь вязняў лагера смерці.
У мінулым годзе пастаноўка мела поспех і добрыя водгукі тэатральных крытыкаў на II Рэспубліканскім фестывалі спектакляў ваенна-патрыятычнай тэматыкі «Перамога» ў Мінску.
10 мая на вялікай сцэне Коласаўскага тэатра – драматычная балада «Не пакідай мяне...» Аляксея Дударава. Гэты спектакль – пра подзвіг, пра жанчын на вайне, пра маладзенькіх дзяўчат-разведчыц, якія здолелі, ахвяруючы сабой, паралізаваць стратэгічна важны вузел сувязі нямецкай арміі. Чацвёра знешне безабаронных, пяшчотных, не спазнаўшых нават асалоду кахання, але моцных духам дзяўчат змаглі тое, што не здолелі б сотні фізічна загартаваных мужчын.
Акрамя таго, ваенная драма «Сотнікаў» прыме ўдзел Міжнародным тэатральным анлайн-фестывалі «Дороги Победы», арганізатарам якога з'яўляецца Дзімітраўградскі драматычны тэатр імя А.М.Астроўскага. Паказ спектакля ў Інтэрнэце запланаваны на 7 мая.
Усе ваенныя спектаклі тэатра імя Якуба Коласа – гэта даніна памяці тым, хто цаной уласнага жыцця дапамог наблізіць Перамогу.
Аляксандр Замкоўскі, вядучы рэдактар Нацыцянальнага акадэмічнага драматычнага тэатра імя Якуба Коласа.
